قضيها الناس لبعضيها

النهارده كدا بالاصلاه ع النبى عايزين نقضيها

اه والله نقضيها

شايفة واحد بيقولى ايه نقضيها دى يا بنتى

تانى انت برده
البت دى شكلها خنيقة وعايزة تتوقف

دايما خنقانى فى توباكتها

بص يا سيدى تعالى هنا بس كدا عشان احكيلكو حدوتة نقضيها

خير اللهم اجعله خير

قضيها.. و"الناس مش لبعضيها"!تصحى الصبح.. تغسل وشك.. تركب الميكروباص.. تروح الجامعة.. تقابل حسن و عبيد ودعاء وهيام..
"صباح الفل ياشباب.. هاه هنقضيها إزاي النهاردة؟"!
"عادي ياعم زي كل يوم.. أي حاجة في أي حاجة... قضيها..."

"مالناس لبعضيها.. هع هع هع هع!".

***
تدخل "سيبر".. لا تلمح كرسيا واحدا فاضي.. تسأل "ميدو" صاحب المكان:
"إيه ياعم هو النهارده أجازة رسمية والناس كلها جاية تشيت ولا إيه؟!"
"ولا أجازة ولا حاجة بس انت عارف الكل عاوز يخلص لعبة Silk road .."
ويشور على واحد مركز اوى في اللعبة ويقول "عندك سيد صاحب محل الحلاقة اللي جنبينا.. بقاله 3 أيام لازق في الكرسي وكل ده وهو لسه في Level 40 بس!"

وتلاقى واحد تانى يقوم من مكانه تجرى انت على الكرسى بتاعه و تقول لـ"ميدو": "طيب يالا هبدأ أنا من دلوقتى.. أنا إمبارح واقف عند Level 39 .. يالا خلينا نقضيها
"مالناس لبعضيها... هع هع هع هع!".
***

فى البيت بقى يا حبى
قاعد تتفرج على قنوات الأغاني ومركز اوى مع الحركات اللى بتعملها ميلسا وإليسا أو أي مغنية آخرها "يسا"!.. يفتح والدك باب الاوضه ويقول لك وهو مضايق:
"إيه ياعم احمد..أنت هتقضي نهارك ليلك كله قدام التليفزيون ولا إيه؟"

تقوله وانت متنح على اليسا:
"طب أعمل إيه يا والدي بس"

"يابني اعمل أي حاجة مفيدة لحياتك... بدل ما أنت قاعد زي أبوالهول كده مابتتحركش من مكانك.. إن شالله حتى تجري في الشوارع أهي رياضة"

"أجري!.. ده أنت غريب قوي يا والدي ده أنا لما بأروح الحمام مرتين بأنهج!.. يا والدي أديني بأقضيها.. ماتيجي تقضيها معايا.. قضيها قضيها..

ده الناس لبعضيها.. هع هع هع هع!".***

اكيد اونت بتقرا الموضوع افتكرت حاجه من دى حصلت معاك ماتكدبش
ها حصل ولا لا؟؟؟
افتكرت كام مرة قلت فيها الجملة الشبابية الخالدة دى
"قضيها مالناس لبعضيها" -لأ مش لازم بعدها يكون فيه هع هع هع هع

خد بالك أن الجملة دي بقت واحدة من أكثر الجمل المتداولة في حياتنا اليومية الشبابية؟

خدت بالك أكتر أنك لما بتقولها فإنك مش بتبقى عارف تعمل أي حاجة مفيدة أو مهمة وأنه مش بيكون قدامك أي خطة ممكن تحاول تنفذها فبتقولها كده وخلاص يمكن علشان تداري عجزك- بلاش عجز دي كلمة جامدة خليها.. فشلك- برضه جامدة!-.. بس هي وصف صحيح فعلا..

لأنك لما بتقول "قضيها ده الناس لبعضيها" فعلا مش بيكون في دماغك أي خطة للاستفادة من الوقت المتاح قدامك.. مش بنتكلم على خطة خمسية اللى بتنفذها على امتداد خمس سنوات..

وإنما ده أنت بتقول "قضيها والناس لبعضيها" لأنك مش بتكون عارف هتعمل النهارده.. بلاش النهارده.. مش عارف تعمل إيه في الساعة اللي جاية.. بلاش الساعة.. ده بتبقى مش عارف هتعمل إيه في الدقيقة اللي جاية.. فـ"بتقضيها" على أساس "إن الناس لبعضيها"!.

طب تسمح لنا نصدمك في هذا الدستور الشبابي الأصيل
دستور"قضيها والناس لبعضيها
هل بتا ليه؟
ودي محتاجة سؤال برضه..

بص حواليك هتلاقي إن العصر اللي إحنا عايشين فيه ده مافيهوش حد بيساعد حد مايستحقش.. يعني م الآخر حياة أصبحت شبكة من المصالح والخدمات.. اللي بيعمل حاجة يلاقيها تاني يوم واللي قاعد كده زي ماهو "بيقضيها" هيفضل طول عمره قاعد يقضيها.. لابيطلع قدام ولا حتى بيرجع لورا.. محلك سر..

والناس"اللي المفروض تكون لبعضيها" بتجري من جنبه وكل واحد بيتطور وبيرتقي وهو قاعد زي الباشا يتفرج على "يسا" وبيلعب "Silk road وجايز يوصل فيها لـLevel 80 بس في الحياة هيفضل مربوط على Level 0!

دي مش دعوة للاكتئاب والانغلاق.. مطلقا بتاتا البتة.. العب Games ياعم واعمل اللي عاوز تعمله.. بس حط في دماغك خطة وهدف.. حتى وأنت بتلعب.. قضيها.. بس ماتقضيهاش كلها في "اللاشيء" كده.. قضيها..

بس وأنت عارف أنك هتقضيها لفترة معينة..
تستعيد فيها طاقتك ونشاطك وذهنك الصافي وبعدين انطلق من جديد..

عارفين إن التعليم في مصر بعافية وأنك لو كنت خريجا، فوارد جدا أنك متلاقيش شغل إلا بعد 32 سنة من دلوقت.. بس ده مش سبب لأنك "تقضيها" كده في الهواء الطلق..

ياعم خليك زي الدكاترة اللي بيطلعوا في التليفزيون
"بيعملوا اللي عليهم والباقي على ربنا!"..

قضيها وأنت عارف أن محدش هيساعدك إلا أنت.. ومحدش هيخليك تقف على رجليك إلا إذا كنت تستحق ده فعلا... ماحدش بيساعد حد بيقضيها طول حياته..

يعني بعد ماتقضيها Games ونت وتليفزيون وسهر وفسح.. اعمل لنفسك جدول لازم تمشي عليه.. مش جدول الضرب هو.. بس مثلا فى إلاجازة .. حط لنفسك خطة.. اليوم الفلاني هاروح لزيارة واحد قريبى.. واليوم العلاني.. هأقضيها فسحة مع اصحابى..والتالت هأقرأ الكتب.. والرابع...و..و.. كده يعني..
عليا النعمه ولا حد عامل حاجه بندن فى مالطه
(اهى نصيحه والسلام واسالنى انا ) كل دا هيفيدك

لما بتقع يا حلو بتكتر سكاكينك

جرب كده وقلنا
لما "بتقضيها" في أي حاجة واليوم ورا اليوم التاني بيعدي.. إيه اللي بتستفيده؟

وقلنا كده لما جربت
أنك تحط لنفسك خطة في أنك تعمل أي حاجة مفيدة لنفسك عملت إيه؟ ونجحت ولا إيه؟

ممكن تكتب لنا وتقول لنا..
إزاي ممكن نقضيها.. وإحنا عارفين الناس ماعدتش لبعضيها؟

انا عمرى ماقلت الكلمه دى ولله
وفعلا صح معظم الى بيصاحبه حد بيصاحبه لمصلحه
هو ده جيلنا الاسود
بس مش كله على فكرة كده
والمره حطيت خطه لنفسى ونجحت فيها
انى ادخل مسابقه رسم والحمد لله نجحت فيها
وميرسى على موضوعك حلو كتير

لا عمري ما قولت الكلمه العجيبه دي
ههههههههههههههههههههههه
انا اصلا مش بسمعها كتير
بس تسلم ايدك يا حبي

بس بردو يا امل انتي وندا متنكرش ان الكلمة دي موجودة وشائعة كمان

هى موجودة بس هى فعلا كلمة مستفزة انا عن نفسي مبقولهاش